Was isch d Jubla für mi? Ja me chönnt sege aus, vilich isch ds nach 20 Jahr Jubla chli eh churzi antwort drfür aber eh sehr passendi. Aber füere mr ds ganze doch chli us süsch gäb ds chli eh churze Bitrag.
I wirde oft mit grosse Ouge aglueggt we lüt ghöre wie viu Arbeit i «gratis» mache, aber isches wük gratis Arbeit? Nei d Jubla zaut die mit unzählig schöne Erinnerige und em ne riesige Netzwerk ah Lüt wome sech eifach guet versteit. I dem Netzwerk het me lüt wome vilich nid oft gseht, da si ir ganze Schwiz verströit si abr me het immer eh gueti Zit weme sech bim ne alass trifft und me lehrt ou di sogenannt Lebensfründe kenne wo so hoffi es ganzes Läbä blibe. Ds Highlight vom Jahr für mi isch ds Summerlager. Es isch d Belohnig für viu Ufwand und Herzbluet wo jede *jedi Jublaner*in i d Jubla steckt und es isch schö ds gseh wie viu Spass und Freud i knapp 2 Wuche Lager eigentlech so Platz het. Es isch eh Zit wome inä angeri weut abtoucht mit sine eigete Regle und einzigartige Gschichte. Um ganz i die eigeti Weut abztouche hani aus Ching immer glueggt dasi kenni Uhr ha so isch ds ganze Zitgfühl verlore gange und me het sech chönne vou und ganz sine spili witmä bises gheisse het ässä und es isch nie ganz klar
gsi isches itz dmittag, znacht oder eifach es zvieri. Das geit aus Leiter nüm ganz so guet aber wemä ni gad Tagesleiter isch chame ou guet da mau hie und da chli d Zit vergesse. Es isch ou faszinierend u schön ds gseh das sech über Jahre immer wider eh Chärn a Ching biudet wo immer und immer wider ufs neue motiviert isch is Summerlager ds cho, aber ou neui Chind werde vo de «autigsessene» Ching immer guet ufgnoh id Jubla. Das zeigt mir ganz guet das d Jubla eh Ort isch wo jede*jedi wiukomme isch. Aus i auem isch di ganzi Vorbereitig ufwändig und ou uf erholsami Ferie hofsch im Summerlager chli vergäbe drfür hesch Abentüür ir Natur, erlebsch spannendi Gschichte und verbringsch eifach eh gueti zit mit tolle Lüt. Hesch haut eifach eh chli Jubla.
I dem Sinn uf witeri 20 Jahr Jubla

Michi

Schreiben Sie einen Kommentar

Ihre E-Mail-Adresse wird nicht veröffentlicht. Erforderliche Felder sind mit * markiert.